आमिर खानचा दुसऱ्यांदा घटस्फोट

आमिर खानचा दुसऱ्यांदा घटस्फोट

by VAIBHAV VARHADI
Jul 03, 2021

बॉलिवूड अभिनेता आमिर खान आणि किरण रावचा तब्बल १५ वर्षांनंतर घटस्फोट घेत आहेत. त्यांनी परस्पर सहमतीने वेगळे होण्याचा निर्णय घेतला आहे. दोघांनी वेगळे होत असल्याची घोषणा केली असून पाणी फौंडेशन आणि सिनेमासाठी एकत्र काम करणार असल्याचे त्यांनी म्हटले आहे.

आमिर आणि किरण राव यांनी परस्पर सहमतीने वेगळे होण्याचा निर्णय घेतला. किरण राव ही आमिर खानची दुसरी पत्नी आहे. दोघांनी २८ डिसेंबर, २००५ रोजी लग्न केले होते. दोघांनी १५ वर्षांनंतर घटस्फोट घेऊन त्यांनी सर्वांनाच धक्का दिला आहे. घटस्फोटावर आमिर आणि किरण यांनी अधिकृत स्टेटमेंटदेखील जारी केले आहे.

दोघांनी स्टेटमेंटमध्ये लिहिले आहे की, 'आम्ही वेगळे होत आहोत. पण, मुलासाठी आम्ही समर्पित पालक म्हणून कायम राहणार आहोत. आम्ही मुलगा आझादचा एकत्र सांभाळ करू. भविष्यात आम्ही एकत्र काम करत राहू. गेल्या १५ वर्षांचा आमचा सहवास खूप आनंददायी होता. याकाळात आम्ही पूर्ण जीवनाचा आनंद घेतला. आमचे नाते विश्वास, आदर आणि प्रेमावर टिकून राहिले. आता आम्ही एका नव्या जीवनाची सुरुवात करत आहोत. पण, पती आणि पत्नी म्हणून नाही.

आम्ही सहपालक म्हणून कुटुंब म्हणून एकत्रित असू, असेही त्यांनी म्हटले आहे. गेल्या काही दिवसांपासून आम्ही वेगळे होण्याची तयारी करत होतो. आम्ही आता वेगळे होण्याची तयारी केली आहे. चित्रपट, पाणी फौंडेशन आणि इतर प्रकल्पांसाठी आम्ही संयुक्तपणे काम करु, असे सांगत दोघांनी आमच्या नात्याला पाठिंबा देणारे कुटुंबीय आणि मित्र परिवारांचे आभार मानले आहेत.