१५ फेब्रुवारी ते ३१ मार्च या कालावधीत थकीत मालमत्ता कर धारकांना दिलासा देणारी विशेष अभय योजना

१५ फेब्रुवारी ते ३१ मार्च या कालावधीत थकीत मालमत्ता कर धारकांना दिलासा देणारी विशेष अभय योजना

by Santosh Jadhav
Feb 17, 2023

नवी मुंबई : मालमत्ताकर हा नवी मुंबई महानगरपालिकेच्या उत्पन्नाचा सर्वात मोठा स्त्रोत असल्याने व यामधून प्राप्त होणा-या महसूलातूनच विविध नागरी सुविधा कामे केली जात असल्याने नियमित कराच्या वसूलीप्रमाणेच महापालिका आयुक्त राजेश नार्वेकर यांनी थकित मालमत्ताकराच्या वसूलीकडेही तितकेच बारकाईने लक्ष दिले आहे.

तथापि मागील दोन वर्षांपासून कोव्हीड प्रभावित काळातील लॉकडाऊन तसेच कोव्हीड लाटेच्या कमी-अधिक झालेल्या प्रभावामुळे अनेकांच्या उद्योग, व्यवसायावर तसेच नोकरीवरही परिणाम झालेला आहे. त्यामुळे जे नागरिक आर्थिक अडचणींमुळे मालमत्ता कर विहीत वेळेत भरू शकले नाहीत अशा मालमत्ताकर धारकांना त्यांच्या थकबाकीमुळे लागलेल्या दंडात सवलत मिळावी यादृष्टीने महापालिका आयुक्त राजेश नार्वेकर यांनी १५ फेब्रुवारीपासून १५ मार्च पर्यंत थकीत मालमत्ता कराच्या दंडात्मक रक्कमेवर ७५ टक्के इतक्या मोठ्या प्रमाणावर सूट तसेच त्यानंतर १६ फेब्रुवारी पासून ३१ मार्च पर्यंत ५० टक्के सूट देणारी अभय योजना लागू करण्यात येत असल्याचे जाहीर केले आहे.

सन २०२२-२३ चे आर्थिक वर्ष ३१ मार्च २०२३ रोजी संपुष्टात येत असून तत्पूर्वी मालमत्ता कर थकबाकीदारांना दिलासा मिळावा व महानगरपालिकेचा थकीत मालमत्ता कर वसूल होऊन ही रक्कम नागरिकांच्या सेवासुविधांसाठी उपलब्ध व्हावी यादृष्टीने महापालिका आयुक्त राजेश नार्वेकर यांनी सकारात्मक दृष्टीकोन नजरेसमोर ठेवून नागरिकांना दिलासा देणारी ही अभय योजना लागू केली आहे.

तरी मालमत्ता कर थकबाकीदार नागरिकांनी नवी मुंबई शहराच्या विकासासाठी आपले योगदान देत विशेष अभय योजनेच्या सुवर्णसंधीचा लाभ घ्यावा आणि लगेच नवी मुंबई महानगरपालिकेच्या www.nmmc.gov.in या वेबसाईटला भेट देऊन सवलतीच्या दंडात्मक रक्कमेसह थकीत मालमत्ता कर भरावा असे आवाहन महापालिका आयुक्त राजेश नार्वेकर यांच्या वतीने करण्यात येत आहे.