वाशी पोलीस ठाण्याची कामगिरी

वाशी पोलीस ठाण्याची कामगिरी

by Santosh Jadhav
Sep 24, 2026

ऑटो रिक्षा चालकाच्या प्रामाणिकपणामुळे प्रवाशाची पैशांनी भरलेली बॅग मूळ मालकाला परत

नवी मुंबई : आज रोजी वाशी पोलीस ठाण्याच्या हद्दीत प्रामाणिकपणाचे एक उत्तम उदाहरण पाहायला मिळाले.

घटनेचा थोडक्यात तपशील असा -

फिर्यादी नामे अमोल अशोक सावंत, वय ३८ वर्षे, व्यवसाय - रिक्षा चालक, रा. पनवेल हे त्यांची ऑटो रिक्षा क्र. MH43BF5535 घेऊन नवी मुंबई परिसरात प्रवासी वाहतूक करतात.

आज दि. २४/०९/२०२६ रोजी सकाळी ११.१५ वा. सुमारास फॉर्म सोसायटी, कोपरखैरणे से-१२ येथून एक अनोळखी इसम त्यांच्या रिक्षात प्रवासी म्हणून बसला व त्याने एपीएमसी मसाला मार्केट येथे सोडण्यास सांगितले. सदर ठिकाणी भाडे देऊन तो प्रवासी निघून गेला.

त्यानंतर फिर्यादी वाशी बस डेपो येथे आले असता त्यांना रिक्षाच्या पाठीमागील सीटजवळ एक लाल रंगाची बॅग मिळून आली. बॅगमध्ये पैशांचे बंडल दिसून आल्याने त्यांनी कोणताही मोह न बाळगता तात्काळ आपले सहकारी शिवाजी के. जेजेराम गव्हाणे यांच्यासह वाशी पोलीस ठाणे येथे धाव घेतली. त्यांनी सदर बॅग पोलीस ठाणे अंमलदार पोलीस हवालदार /१०० अशोक कचरे, महाराष्ट्र पोलीस उपनिरीक्षक मामीलीवार यांचेकडे सुस्थितीत जमा केली.

योगायोगाने ज्यांची बॅग विसरलेली होती ते इसम नामे माधवजी लालजी भानुशाली, वय ७० वर्षे, रा. कोपरखैरणे, नवी मुंबई हे देखील पोलीस ठाण्यात आले होते. पोलिसांनी दोघांच्या समक्ष सदर बॅग उघडून त्यामध्ये पैशांची खातरजमा करून ती बॅग सुस्थितीत त्यांच्या ताब्यात देण्यात आली.

तरी सदर घटनेबाबत दोन्ही पक्षांचा कोणताही संशय अगर तक्रार नाही.

रिक्षा चालक अमोल सावंत यांच्या या प्रामाणिकपणाचे वाशी पोलीस ठाण्याचे वतीने कौतुक करण्यात येत असून, नागरिकांनी अशा प्रामाणिक नागरिकांचा आदर्श घ्यावा, असे आवाहन पोलीस ठाणे अंमलदार, वाशी पोलीस ठाणे, नवी मुंबई यांनी केले आहे.