लोकसभेसाठी ठाकरे गटाची तयारी, १० नेत्यांवर सोपवली मोठी जबाबदारी

लोकसभेसाठी ठाकरे गटाची तयारी, १० नेत्यांवर सोपवली मोठी जबाबदारी

by Santosh Jadhav
Nov 27, 2023

मुंबई : आगामी लोकसभा, विधानसभा निवडणुकांच्या पार्श्वभूमीवर शिवसेना (उद्धव बाळासाहेब ठाकरे) गटाने जोरदार तयारी सुरु केली आहे. भाजपसह शिंदे गटाला शह देण्यासाठी ठाकरे गटाने संघटनात्मक बांधणी केली आहे.

पक्षप्रमुख उद्धव ठाकरे यांनी महाराष्ट्रातील संघटनात्मक बांधणीवर भर देण्यासाठी विभागीय नेत्यांची यादी जाहीर केली आहे. या १० नेत्यांवर वेगवेगळ्या विभागांची जबाबदारी सोपवण्यात आली आहे.

उत्तर महाराष्ट्र, पश्चिम महाराष्ट्र ,कोकण, मराठवाडा, पश्चिम आणि पूर्व विदर्भाची जबाबदारी दहा नेत्यांवर सोपविण्यात आली आहे. यामध्ये खासदार राजन विचारे , संजय राऊत, अनिल देसाई, अनंत गीते, चंद्रकांत खैरे, सुनील प्रभू, भास्कर जाधव, विनायक राऊत यांच्यासह आमदार रवींद्र वायकर यांच्या नावाचा समावेश आहे. या सर्व नेत्यांवर वेगवेगळ्या विभागाची संघटनात्मक जबाबदारी सोपवण्यात आली आहे.

मुख्यमंत्री एकनाथ शिंदे यांच्या बालेकिल्ल्यात ठाकरे गटाने खासदार राजन विचारे यांच्याकडे जबाबदारी सोपवली आहे. राजन विचारे हे ठाणे, कल्याण, भिवंडी, पालघर लोकसभा निवडणुकीत ठाकरे गटाचे प्रतिनिधित्व करतील.

संजय राऊत यांच्यावर उत्तर महाराष्ट्रासह, नगर, शिर्डी, पुणे, मावळची जबाबदारी देण्यात आली आहे. तर अरविंद सावंत पश्चिम विदर्भ, तर भास्कर जाधव यांच्याकडे पूर्व विदर्भाची जबाबदारी सोपवण्यात आली. दरम्यान, आगामी लोकसभा आणि विधानसभा निवडणुकीसाठी जानेवारीत शिवसेना ठाकरे गटाकडून राज्यव्यापी शिबिर घेतले जाणार आहे. तसेच, जानेवारी महिन्यात उद्धव ठाकरे महाराष्ट्र दौरा करणार आहे. उद्धव ठाकरे यांच्या महाराष्ट्र दौरा आणि जाहीर सभांचे नियोजन सुद्धा लवकर जाहीर केले जाणार आहे.

खासदार संजय राऊत यांच्याकडे लोकसभा मतदारसंघ नाशिक, दिंडोरी, जळगाव, रावेर, धुळे, नंदुरबार, नगर, शिर्डी, पुणे, बारामती, शिरूर, मावळ (विधानसभा पिंपरी चिंचवड, मावळ) मतदारसंघांची जबाबदारी सोपवण्यात आली आहे.

अनंत गीते यांच्या खांद्यावर कोकण (रायगड) विभागाची जबाबदारी सोपवण्यात आली आहे. ते रायगड, मावळ (विधानसभा पनवेल, कर्जत, उरण ) मतदारसंघात पक्षवाढीसाठी तसेच निवडणुकीची जबाबदारी पार पाडणार आहे.

माजी खासदार चंद्रकांत खैरे यांच्याकडे मराठवाडा विभागाची जबाबदारी देण्यात आली आहे. खैरे संभाजीनगर, जालना लोकसभा मतदारसंघात काम पाहणार आहे.

खासदार अरविंद सावंत यांच्याकडे पश्चिम विदर्भाची जबाबदारी देण्यात आली आहे. बुलढाणा, अकोला, अमरावती, यवतमाळ - वाशिम, वर्धा लोकसभा मतदारसंघात ठाकरे गटाचे काम अरविंद सावंत पाहणार आहे.

खासदार अनिल देसाई यांच्याकडे पश्चिम महाराष्ट्राची जबाबदारी सोपवण्यात आली आहे. अनिल देसाई हे सातारा, माढा, सांगली, कोल्हापूर, इचलकरंजी मतदारसंघात काम पाहणार आहे.

आमदार सुनील प्रभू मराठवाड्यातील काही जिल्ह्यांसह सोलापूर धाराशीव, लातूर, बीड लोकसभेसाठी जबाबदारी सोपवण्यात आली आहे.

आमदार भास्कर जाधव यांच्याकडे पूर्व विदर्भातील नागपूर, रामटेक, भंडारा-गोंदिया, चंद्रपूर, गडचिरोली-चिमूर लोकसभा मतदारसंघाची जबाबदारी सोपवण्यात आली आहे.

खासदार विनायक राऊत यांच्याकडे कोकण विभागाची जबाबदारी सोपवण्यात आली आहे. अरविंद सावंत हे रत्नागिरी, सिंधुदुर्ग लोकसभा मतदारसंघात पक्षवाढीवर भर देणार आहे.

आमदार रवींद्र वायकर यांच्याकडे मराठवाड्यातील नांदेड, हिंगोली, परभणी लोकसभा मतदारसंघाची जबाबदारी सोपवण्यात आली आहे.