निवडणुकीची अधिसूचना आणि राजपत्राच्या प्रती राज्यपालांना सादर

निवडणुकीची अधिसूचना आणि राजपत्राच्या प्रती राज्यपालांना सादर

by Santosh Jadhav
Nov 24, 2024

भारत निवडणूक आयोगाचे उप मुख्य निवडणूक आयुक्त हिरदेश कुमार आणि राज्याचे मुख्य निवडणूक अधिकारी एस. चोक्कलिंगम यांनी राज्यपाल सी पी राधाकृष्णन यांची आज राजभवन मुंबई येथे भेट घेऊन त्यांना राज्य विधानसभा निवडणुकीच्या जाहीर झालेल्या निकालाची अधिसूचना , निवडून आलेल्या सदस्यांची यादी आणि राजपत्राची प्रत सादर केली. महाराष्ट्र विधानसभेच्या सार्वत्रिक निवडणूकांचे निकाल काल २३ नोव्हेंबर २०२४ रोजी जाहिर करण्यात आले.

लोकप्रतिनिधित्व अधिनियम, १९५१ च्या कलम ७३ मधील तरतूदीनुसार, या निवडणूकीमध्ये निवडून आलेल्या उमेदवारांची नावे, भारत निवडणूक आयोगाच्या २४ नोव्हेंबर, २०२४ च्या अधिसूचनेन्वये महाराष्ट्र शासन राजपत्रात प्रसिध्द करण्यात आली आहेत.

सदर राजपत्र आणि अधिसूचनेच्या प्रती निवडणूक आयोगाचे उप मुख्य निवडणूक आयुक्त , राज्याचे मुख्य निवडणूक अधिकारी यांनी आज राज्यपालांना सादर केल्या. यावेळी राज्याचे अतिरिक्त मुख्य निवडणूक अधिकारी किरण कुलकर्णी, सह मुख्य निवडणूक अधिकारी मनोहर पारकर, भारत निवडणूक आयोगाचे सचिव सुमन कुमार दास तसेच कक्ष अधिकारी निरंजन कुमार शर्मा हे देखील उपस्थित होते.