कोरोनावर प्रभावी ठरणारे २ डीजी औषध झाले लाँच!

कोरोनावर प्रभावी ठरणारे २ डीजी औषध झाले लाँच!

by Santosh Jadhav
May 17, 2021

कोरोनावर प्रभावी ठरणाऱ्या २ डीजी औषधाचे लाँचिंग संरक्षण मंत्री राजनाथ सिंग यांच्या हस्ते सोमवारी करण्यात आले. २ डिओक्सि-डी-ग्लुकोज अर्थात २ डीजी औषध डीआरडीओच्या वैज्ञानिकांनी विकसित केले आहे. संरक्षण मंत्री राजनाथ सिंग यांनी औषधाचा पहिला बॅच (१० हजार डोसेस) केंद्रीय आरोग्य मंत्री हर्षवर्धन यांना दिला.

कोविड - १९ संसर्गाने सध्या जगभरात हाहाकार उडविलेला आहे. या पार्श्वभूमीवर डिफेन्स रिसर्च अँड डेव्हलपमेंट ऑर्गनायझेशन म्हणजेच डीआरडीओच्या अखत्यारितील इन्स्टिट्यूट ऑफ न्‍यूक्लियर मेडिसिन अँड अलाईड सायन्सेसने कोरोनावर प्रभावी ठरणारे २ डीजी औषध विकसित केले आहे. हाइड्रॉक्‍सी क्‍लोरोक्विन , रेमडिसिविर , आइवरमेक्टिन यासारखी औषधे कोरोना संसर्गावर कितपत उपयुक्त ठरतात, यावर गेल्या वर्षभरापासून संशोधन सुरु आहे. मात्र "२ डीजी" कडे अँटी कोविड औषध म्हणून पाहिले जात आहे.

२ डीजी विकसित करण्यात हैदराबादस्थित डॉ. रेड्डीज लॅबरेटरीज कंपनीने देखील महत्त्वाची कामगिरी बजावली आहे. या कंपनीकडूनच २ डीजीचे उत्पादन केले जाणार आहे. हे औषध पावडरच्या स्वरूपात असणार आहे. गेल्या वर्षी कोरोनाची पहिली लाट आली होती, त्या वेळपासून इन्स्टिट्यूट ऑफ न्‍यूक्लियर मेडिसिन अँड अलाईड सायन्सेसने २ डीजी वर संशोधन सुरु केले होते. मे २०२० मध्ये ड्रग कंट्रोलर जनरल ऑफ इंडियाने या औषधाच्या कोविड रुग्णांवरील टप्पा २ च्या ट्रायलला मंजुरी दिली होती. हे ट्रायल ऑक्टोबर महिन्यापर्यत सुरू होते. कोरोना रुग्णांसाठी हे औषध सुरक्षित असून रिकव्हरीमध्येही ते मदत करते, असे संशोधनातून दिसून आले होते.

सकारात्मक निष्कर्षानंतर २ डीजीच्या तिसऱ्या टप्प्यातील ट्रायलला परवानगी देण्यात आली होती. अखेर ९ मे रोजी ड्रग कंट्रोलरने या औषधाच्या आपत्कालीन वापरास मंजुरी दिली होती. २ डीजी हे अणुचे परिवर्तित रूप आहे. याद्वारे ट्यूमर , कॅन्सर पेशींवरही उपचार होऊ शकतो. कोरोनाने बाधित असलेल्या रुग्णांची ऑक्सिजनवरील निर्भरता कमी करण्याचे काम २ डीजी करते. सेकंडरी औषधाच्या रुपात वापर करण्यास २ डीजी ला परवानगी देण्यात आली आहे. हे औषध जवळपास ग्लुकोजसारखे असते, पण ते ग्लुकोज नसते.