० ते ५ वर्षाखालील ६९७३९ मुलांनी घेतला पोलिओचा डोस

० ते ५ वर्षाखालील ६९७३९ मुलांनी घेतला पोलिओचा डोस

by Santosh Jadhav
Feb 28, 2022

० ते ५ वर्षाखालील ६९७३९ मुलांनी घेतला पोलिओचा डोस

पल्स पोलिओ लसीकरण मोहीमेअंतर्गत नवी मुंबई महानगरपालिका आरोग्य विभागाच्या वतीने महापालिका आयुक्त अभिजीत बांगर यांच्या मार्गदर्शनाखाली पल्स पोलिओ लसीकरण मोहीम प्रभावी रितीने राबविण्यात आली. नवी मुंबई महानगरपालिकेच्या २३ नागरी आरोग्य केंद्रांच्या माध्यमातून खाजगी वैद्यकीय व्यावसायिकांचे दवाखाने, सोसायटी कार्यालये, रूग्णालये, रेल्वे स्टेशन, बस डेपो, महत्वाचे नाके अशा विविध ठिकाणी ६०० स्थायी, ९४ ट्रान्झिट व २८ फिरते मोबाईल असे एकूण ‌‌‌‌‌७२२ पोलिओ लसीकरण बूथ स्थापन करण्यात आले होते. यामध्ये ६९७३९ बालकांना पोलिओ लसीकरण करण्यात आले. म्हणजेच ७८.९५ % अपेक्षित लाभार्थी मुलांचे लसीकरण झाले.

' दोन थेंब प्रत्येक वेळी, पोलिओवर विजय दरवेळी' - या घोषवाक्यास अनुसरून ५५३१२२ घरांपर्यंत नागरी आरोग्य केंद्रांच्या माध्यमातून पोलिओ लसीकरण मोहीमेची माहिती पोहचवून ८७२ पथकांव्दारे जनजागृती करण्यात आली होती. या शिवाय ७२३ बॅनर्स आणि ३ हजारहून अधिक पोस्टर्समधून व्यापक प्रमाणात माहिती प्रसारित करण्यात आली. साधारणत: ८८३३० इतके ५ वर्षाखालील लाभार्थी नजरेसमोर ठेवून या मोहिमेचे नियोजन करण्यात आले होते.

कोरोनाच्या पार्श्वभूमीवर लसीकरण बूथवरील २ हजारहून अधिक कर्मचारी, स्वयंसेवक यांना लसीकरणाचे सुयोग्य प्रशिक्षण देण्यात आले होते तसेच कोव्हीड सुरक्षाविषयक बाबींचे काटेकोर पालन करण्याच्या सूचना देण्यात आल्या होत्या. नागरिकांनी परस्परांमध्ये सुरक्षित अंतर राखावे याची काळजी घेण्यात येत होती. मास्कचा वापर स्वयंसेवकांसह नागरिकांनाही अनिवार्य करण्यात आला होता. बालकाला लस पाजण्यापूर्वी व पाजल्यानंतर हात सॅनिटाईज करण्यात येत होते. लस देताना बालक पालकाकडेच असेल याची काळजी घेऊन बाळाला स्पर्श न करता तसेच ड्रॉपरचा स्पर्श बाळाच्या तोंडाला होणार नाही याची दक्षता घेऊन लस पाजण्यात येत होती. अशा प्रकारची कोव्हीड सुरक्षा विषयक सर्वोतोपरी काळजी सर्व पोलिओ बूथवर घेण्यात येत होती.

तथापि काही कारणांमुळे ज्या संभाव्य लाभार्थी बालकांचे लसीकरण होऊ शकले नाही त्यांना दि. २८ फेब्रुवारी ते ४ मार्च २०२२ या कालावधीत घरोघरी जाऊन पल्स पोलिओ डोस देण्याचे नियोजन करण्यात आले आहे.

भारत देश कायमस्वरूपी पोलिओमुक्त रहावा यादृष्टीने अतिशय महत्वाच्या अशा राष्ट्रीय पल्स पोलिओ लसीकरण मोहीमेस नवी मुंबईकर नागरिकांनी चांगला प्रतिसाद दिला. तथापि विविध कारणांमुळे ज्या बालकांना बुथवर डोस घेता आलेला नाही अशा बालकांच्या घरांना भेट देणा-या स्वयंसेवकांना आपल्या बालकांबाबत माहिती योग्य माहिती देऊन पोलिओ डोस पाजून घेण्याबाबत संपूर्ण सहकार्य करण्याचे आवाहन महापालिका आयुक्त अभिजीत बांगर यांच्या वतीने करण्यात येत आहे.