एफ जी नाईक महाविद्यालयात सायबर सुरक्षा जागरूकता या विषयावर चर्चासत्र

एफ जी नाईक महाविद्यालयात सायबर सुरक्षा जागरूकता या विषयावर चर्चासत्र

by Santosh Jadhav
Mar 16, 2024

एफ जी नाईक महाविद्यालय कोपरखैरणे नवी मुंबई येथे सायबर सुरक्षा जागरूकता या विषयावर दिनांक १५ मार्च २०२४ रोजी चर्चासत्र आयोजित करण्यात आले होते . ज्यामध्ये सर्व शिक्षक शिक्षकेतर कर्मचारी विद्यार्थी उत्साहाने सहभागी झाले. सध्याचे वाढते सायबर गन्हे आणि त्यातून निर्माण होणारे संभाव्य धोके समजून घेणे हा या कार्यक्रमाचा मुख्य उद्देश होता.

कोपरखैरणे पोलीस ठाणे येथील महिला सहाय्यक पोलीस निरीक्षक श्रीम चैताली साबळे यांनी ऑनलाईन सुरक्षे बाबतच्या सर्वोत्तम पद्धती बद्दल माहिती दिली. घर आणि कामाच्या ठिकाणी सायबर सुरक्षेच्या संदर्भात घ्यावयाच्या दक्षतेबाबतही मार्गदर्शन केले. तंत्रज्ञानातील प्रगतीमुळे आणि मोबाईल वापरकर्त्याची संख्या वाढत्याने सायबर गुन्ह्यांच्या संख्येत देखील वाढ झाली आहे. समाजातील सर्व घटकातील लोक वेगवेगळ्या पद्धतीने फसवणुकीचे बळी ठरत आहेत असा उल्लेख करून त्यांनी सायबर गुन्ह्यांची जटिलता आणि समोर येणारी आव्हाने स्पष्ट करण्यासाठी काही चलचित्रे दाखविले. फोनवर योग्य स्क्रीन लॉक असणे, लॅपटॉप आणि ई मेल आयडी साठी योग्य पासवर्ड असणे अत्यंत महत्त्वाचे आहे. कोणाशीही ते शेअर न करणे याबाबतचा मोलाचा सल्ला दिला. नवी मुंबई पोलीस आयुक्तालयामध्ये अस्तित्वात असलेल्या निर्भया पथका संदर्भात विशेष माहिती उपस्थित विद्यार्थ्याना देण्यात आली. सदर निर्भया पथकाद्वारे कशाप्रकारे कामकाज केले जाते व या पथकाचा नागरिकांना विशेषतः महिलांना कशाप्रकारे लाभ होतो याबाबतची माहिती सोप्या भाषेत विविध उदाहरणांसह समजावण्यात आली. त्याचप्रमाणे डायल ११२ बाबत सविस्तर माहिती देऊन समाजामध्ये कोणतीही कायदा व सुरक्षेचा प्रश्न निर्माण करणारी घटना निदर्शनास येईल तर तात्काळ ११२ क्रमांकावर संपर्क साधून पोलीस प्रशासनास सदर घटनेबाबत कळविण्याबाबत आवाहन केले. विद्यार्थिनींना महाविद्यालयामध्ये येताना जर कोणत्याही अनोळखी इसमा कडून त्रास देण्यात आला तर विद्यार्थिनींनी तात्काळ ११२ क्रमांक वर तसेच स्थानिक पोलीस ठाण्याच्या संपर्क क्रमांकावर तक्रार द्यावी व पोलिसांचे सहकार्य प्राप्त करावे असे आवाहन केले. सदर कार्यक्रमास महिला पोलिस अंमलदार गौरी चांदे, गोपनीय विभागाचे पोलीस अंमलदार संतोष आव्हाड आणि डॉ. टी के टोपे महाविद्यालयाचे प्रा. डॉ. प्रकाश सावंत हे उपस्थित होते.

सायबर गुन्ह्यांच्या विविध प्रकाराबद्दल बद्दल जाणून घेण्यात आणि जागरूक कसे राहायचे आणि या गुन्ह्यांना बळी पडण्यापासून कसे रोखायचे हे जाणून घेण्यासाठी ही चर्चा खूप फलदायी ठरली . या चर्चासत्राचे सूत्रसंचालन प्राध्यापिका जयश्री दहाट यांनी केले. सदर कार्यक्रमास महाविद्यालयाचे प्राचार्य प्रताप महाडिक ,महाविद्यालयातील महिला कक्षाच्या प्रमुख प्राध्यापिका स्मृतिगंधा बिडकर , विद्यार्थिनी प्राध्यापक वर्ग आणि शिक्षकेतर कर्मचारी उपस्थित होते. सदर कार्यक्रमाचे आभार प्रदर्शन महाविद्यालयातील प्राध्यापक डॉ. दत्तात्रय घोडके यांनी केले.