३१ ऑक्टोबरपर्यत दाखल करता येतील नवी मुंबई महानगरपालिका प्रारुप विकास योजनेबाबत सूचना / हरकती

३१ ऑक्टोबरपर्यत दाखल करता येतील नवी मुंबई महानगरपालिका प्रारुप विकास योजनेबाबत सूचना / हरकती

by Santosh Jadhav
Oct 10, 2022

नवी मुंबई : नवी मुंबई महानगरपालिकेची प्रारूप विकास योजना ही महाराष्ट्र प्रादेशिक नियोजन व नगररचना अधिनियम, १९६६ (यापुढे याचा उल्लेख “उक्त अधिनियम” असा केलेला असेल) चे कलम २६(१) अन्वये तयार करून जनतेकडून सूचना व हरकती मागविणेसाठी प्रसिद्ध केलेली असून त्याबाबतची सूचना महाराष्ट्र शासन राजपत्रात व स्थानिक वृत्तपत्रामध्ये दिनांक १०/०८/२०२२ रोजी प्रसिद्ध झालेली आहे. तसेच त्याबाबतचे शुध्दीपत्रक महाराष्ट्र शासन राजपत्रात दिनांक २५/०८/२०२२ रोजी व स्थानिक वृत्तपत्रात दिनांक ०२/०९/२०२२ रोजी प्रसिद्ध झालेले आहे.

या अधिनियमातील कलम २६(१) मध्ये नमूद केल्यानुसार सूचना / हरकती दाखल करण्यासाठी निर्धारित कालावधी ६० दिवसांचा आहे. त्यानुसार वर्तमानपत्रात प्रसिध्द झालेल्या दिनांक ०२/०९/२०२२ रोजीच्या शुध्दीपत्रकापासून सूचना / हरकती दाखल करण्याचा अंतिम दिनांक ३१/१०/२०२२ असा आहे.

याव्दारे नवी मुंबई महानगरपालिका क्षेत्रातील नागरिकांना सूचित करण्यात येते की, नवी मुंबई महानगरपालिका प्रारूप विकास योजनेबाबत काही हरकती / सूचना असल्यास मा.आयुक्त तथा प्रशासक, नवी मुंबई महानगरपालिका यांचेकडे त्या लेखी स्वरूपात पाठवाव्यात. सदर हरकती / सूचना नवी मुंबई महानगरपालिका मुख्यालय, मुख्य टपाल कक्ष तसेच सहायक संचालक, नगररचना यांचे कार्यालय व सर्व विभाग कार्यालये येथे स्विकारण्याची व्यवस्था करण्यात आलेली आहे, याची सर्व नागरिकांनी नोंद घ्यावी असे आवाहन महापालिका आयुक्त तथा प्रशासक राजेश नार्वेकर यांच्या वतीने करण्यात येत आहे.